یاى تعطیلاتى و اوشاق لارین، بوش واخت لارى
یاى تعطیلاتى و اوشاق لارین، بوش واخت لارى یازان: حسین واحدی اؤنوموزده
ایستى، ایسته مه لى، یام-یاشیل، گؤزل-گؤیچک یاى فصلى واردیر. اولا بیلر، ایندى سیز
بو یازینى اوخودوغونوزدا، یای دا گلیب چاتیب دیر. سیز ایسه، یای آخشامیندا، ائیوان
دا ایله شیب، یای مئیوه لرین یانینیزا قویوب، بو یازینی اوخویورسونوز. سؤز-صحبت یاى
ایله تعطیلات دان گئدیر. اوچ آى اوخول لارین (مدرسه لرین) تعطیل اولماسى اوشاق لار
اوچون هر ایش ائتمه یه بیر بؤیوک فرصت دیر. اوچ آى بوش واخت! اوچ آى درس دن-مشق دن
اوزاق! اوچ آی دینجلمک! یای دان اؤنجه
کئچیریلین سیناو (امتهان) لاردان قاباق، اوشاق لار، یئنى یئتمه لر و بوتونلوک ده
ابتدایی دن، اورتا تحصیلاتینى کئچیرنلره جن، دوزگونجه امتهان وئریب یای دا آرخایینجا
گزیب-دولانیب یوخسا تفریحى کیلاسلارا گئتمک اوچون تعطیلاتین باشلانماسینی گؤزله
ییرلر. بو خوش چاغ لار، هامی اوشاقلاری سئویندیرمیر. بیر پارا اوشاقلار ایسه یایین
گلیب چاتماسینى چوخ دا سئومه ییرلر. اونلار عاییله لرینین اقتصادی وضعیت لرینین
آشاغی اولدوق لاری اوچون، یای دا چالیشماق لاری گرکلی اولور. یئنى یئتمه (نوجوان)
چاغلاریندا، عؤمورلریندن فایدالی استفاده ائتمک یئرینه، آز پول لارا بویون اگیرلر! هر حال دا یای
فصلی گلیب چاتیب، سوووشوب، بیته جکدیر. زامانى دا، دوزگون فایدالانانلار قازاناجاق
لار. بو اوزون
تعطیلات لارا برنامه ایله هدف اولماسا، زامان الدن قاچاجاق دیر. بیزیم جامعه ده،
بو ایکى کلمه چوخلارینا تانیش دئییل دیر. بو اوزدن عاییله لرین اوشاق لاریدا بو
واخت لاری هئچ فایدا آپارمادان الدن وئریرلر! اوشاقلاریمیزین
گله جکلرینه، نه لرى، دوشونموشوک؟ هانسی برنامه لری سیرالامیشیق؟ هانسی یولو
اونلارا گؤسترمیشیک؟ اوشاقلاریمیزا برنامه تؤکمه یى، آماج (هدف) سئچمه یى اؤیرتمیشیک
مى؟ ... و یوزلرجه بئله سوال لارا تاى سوال لارى اؤزوموزدن سوروشا بیله ریک. یای گلنده،
بعضی آتا-آنالار اؤزگه لرین یانیندا شیشه لنمک اوچون اوشاق لارینی ایکی-اوچ یئرده
مختلف کیلاس لارا یازدیریرلار. اؤزگه دیل کیلاسی، موسیقى، بیلگی سایار، ایدمان
و...! یازیق اوشاغین بئیینى دینجلمه دن بو کیلاسدان چیخیب اوبیری کیلاسا گئدیر!!
بئله عاییله لر، اوشاغین گله جه گینه اؤنم (اهمیت) وئرمک یئرینه، قاپی-قونشو،
اؤزگه لر ایله قوهوم لارین یانیندا اوشاق لاریندان بوشونا تعریف ائتمه گى، داها
چوخ دوشونورلر! بئله عاییله
لرین یانیندا، بعضی عاییله لر ده، اوغلان اوشاق لارینی، اللریندن بیر صنعت گلسین
دئیه، بیر صنعت کار یانینا گؤنده ریرلر. قیزلارین ایسه تیکیجیلیک (خیاطى) یوخسا
اینجه ال ایشلرینى اؤیرنمه کیلاسلارینا یازدیریرلار. سونوندا اوشاق بیلمیر درس
اوخویاجاق یوخسا صنعت دالیسیجا گئده جک دیر؟! مختلف کولتور
(فرهنگ) صاحبی اولان عاییله لرین ایچینده، بعضی لرى ده برنامه ایله هدف اوزوندن
ایشلرین قاباغا آپاریب، گله جکلری ایله ایندیکی چاغ لارینا قیسا زامانلى و اوزون
زامانلى برنامه لر یازیرلار. بئله اینسانلار بوگون مکانیک یانینا، صاباح ایسه
بیلگی سایار کیلاسینا گئتمزلر. اونلار اؤز یوللارین سئچیب، او یولدا دا نئجه آددیم
آتاجاق لارینى بللى ائدیب لر. بئله عاییله لرین اوشاقلاری دا دوزن (نظم) اوزو ایله
یاشایارلار. یاشاییشیمیزدا
اؤنجه اؤزوموز سونرا ایسه اوشاق لاریمیز، زامان دان دوز استفاده ائتمه یی
باجارمالیدیرلار. برنامه میز اولماسا، اوچ آی یوخ، بیر ایل ده تعطیل اولسا نه
ائدیب، ائتمه یه جه گیمیزى بیلمه یه جه ییک. برنامه ده، هدف اوچون یازیلار. برنامه
بیر گون، بیر یئددیجه (هفته)، بیر آى، بیر ایل، یوخسا (و یا) نئچه ایللیک یازیلمالی
دیر. بو دگرلى ایشی اؤز اوشاقلاریمیزادا اؤیرتمه لیییک. گؤزل یاى دا
فایدالی ایش لر ائتمک اوچون زامانی الدن وئرمه دن، ایندی دن عاییله نیز ایله
بیرلیک ده، هدفینیزى سئچیب، برنامه لرینیزی یازماغا باشلایین ... .
آللاهیم سلام
آللاهیم
سلام یازان: حسین واحدی سلام آللاهیم. گئجه لری، گوندوز ائدن, گؤندوزلری ایسه گئجه ائدن آللاهیم. اورکلری
بیر ائدن. یوواسیندا کور قوشون روزاسین وئرن. آج لاری توخ ائدیب، مصلحت له هر نه
وئرن. شوکورلر اولسون وئردئیینه، وئرمه سنده، راضی اولدوم شوکور ائتدیم. گیزلیجه
الدن توتانسان. داردا هئچ کیمسه نی قویمایانسان، اورکدن چاغیران بیری وارسا هئچ نه
یى اوره گینده قویمازسان. اورکلری
دؤیوندورن، اؤز عشقین له بوروندورن، سن جانان سان، سئوگی سن سن. یاغیش یاغیر،
بولود باخیر، ایلدیریم لار شاخیر، شاخیر. سئل لر، سولار شاققیلداییر، قوشلار
اوخور، گوللردن خوش عطیر قوخور. یئل بویان- اویانا باخیر. یئردولانیر. آى قاچیر،
گونش قووآلیر. آى توو آلیر.
گونش قالیر. بونلار سنین گوجون. سن یارادان، باغیشلایان، یاخشیلیق لا قارشیلایان،
قویما بیزی تک باشینا. بیراخما هئچ کیمسه نی اؤز حالینا. مرحمت ائت، باغیشلا، دوز یول لاری بیزه آللاه.
صفالى نفسلى، قالارگى سسلى، آشیق عزیز مراد خان
صفالى نفسلى، قالارگى سسلى، آشیق عزیز مراد خان
یازان: حسین واحدی
کئچمیشدن ایندییه دک، آذربایجانین اصیل آشیق موسیقی سینین درنه یى اولان، اورمیه نین دول ماحالى بؤلگه سى، تاریخ بویو آشیق موسیقی سینه، بؤیوک اوستادلار پاى وئریب دیر. اونلاردان، ، دوللو مصطفی، دوللو اباذر، آشیق فرهاد، دوللو محمد، و ... آد چکمک اولار.
دول دا یاشایان اینسانلار آشیق بئله اولماسالاردا، آشیقلیقدان باش چیخاریب، قاینار بولاغا تاى سینه لریندن شعر قاینایاجاق دیر.
آدلارین چکدیغیم اینسانلارین یانیندا، یاز هوسلى، باهار سسلى، آشیق صنعتینین بؤیوک ایله تایسیز اوستادلاریندان بیرى اولان، رحمتلیک آشیق «عزیز مراد خان» دیر.
حسن اوغلو، آشیق عزیز مرادخان 1301- جی ایلده اورمونون دول ماحالیندا یئرلشن سامیرتی کندینده دونیایا گؤز آچدى. او، دول ماحالین دا، آشیقلیق صنعتى یاشادیغى اوچون، یئنى یئتمه چاغلاریندان، آشیقلیق ایله تانیش اولوب، آشیق موسیقى سى ایله یاشایار. آشیق عزیز اؤنجه لر، توى لاردا آد چیخاریب، اؤز هونرین هامى یا گؤستریب دیر. اونون تایسیز ایله فرقلى سسى، آدینى دیل لره سالیب، سئویملى بیر شخصیت کیمى تانیدیر.
آشیق عزیز، آشیق لیغى، اورمیه نین باشقا آدلیم آشیغى اولان، رحمتلیک آشیق فرهاد-دان اؤیرنیب دیر. آشیق فرهاد، آشیق عزیز ایله تانیش اولان دا، اونون یئتهنهگین، آنلاییب، شاگیردلیگه قبول ائدر.
چوخ آلچاق کؤنول، باش آشاغى ایله متین اولان، آشیق عزیز، اوستاسینین یانیندا ایسه حؤرمت قازانیب، سئویلمیشدیر. مراسیم لرده، آشیق عزیز مجلیسه قاتیلان دا، آشیق فرهاد اونون آیاغینا قالخیب، حؤرمت له یاناشارمیش. مجلس ده کیلر، آشیق فرهاد دان، «نه دن، اؤز شاگیردینه بو قهدر سایغى گؤستهریرسن؟» سوروشاندا، او ایسه، «من، یاش ایله شاگیردلیک اوچون یوخ، اونون معرفت ایله آنلاغینا حؤرمت ائدیرم» جاواب وئررمیش.
اورمو اهالیسی ده چوخ چاغ لار، آشیق عزیزى مجلسلری ایله توی شنلیکلرینه چاغیراردیلار. او، چالدیغی هاوالاردا آشیق فرهادین یولونون داوامچیسی اولموشدور. آشیق عزیز توی-شنلیک مراسملریندن علاوه هم ده اورمیه رادیوسوندا بایراملاردا و مختلف وئرلیشلرده چیخیش ائدرکن، باتى آذربایجان اهالیسینین ائولرینه بو واسطه ایله قوناق اولور. بؤیوک اوستادی آشیق فرهادی یادلارا سالان عزیز، دئییلنلره گؤره اونون تکجه شاگردی و یا ان آزی اونون یولونون دوامچیسی اولان تکجه شاگرد ایمیش. آشیق عزیز گؤزل ایله ملاحتلی سسی له، هله ده اورمو آشیق صنعتی سئورلرینین ذهنینده و کؤنوللرینده خوش خاطرهلر له آنیلیر.
آشیق عزیز، ساز یانیندا، دگیرمانچیلیق ائدرمیش. او بؤیوک اوستاد، عؤمورونون سونوناجان، دگیرمانچیلیق ائدیب، سازى ایسه اؤزوندن آییرماییر. آنجاق دگیرمانچیلیق گئت-گئده سسینده اثر قویوب، سونرالار دا، آسم خسته لیگی توتوب، ائله بو سبب له،، هله اورتا یاشلارینا یئنى آددیم قویسادا دونیادان وداع لاشیب 7/10/1351 تاریخینده یاشاما گؤز یومور.
آنجاق، صفالى نفسلى، قالارگى سسلى آشیق عزیز-ین یاشام چاغیندان قیرخ ایل کئچسه ده، یادى ایله خاطیره سى هله ده اورکلرده دیرى قالیب، یاشام وارکن، قالارگى اولاجاق دیر.
اومود ائدیرم، بئله اینسانلاریمیزین ساغ ایکن، قه دیرلرین بیلیب، کئچمیشده یاشاییب، گئدنلریده یاشام بویو آدلارین یاشاتماغا چالیشاق.
قایناق لار:
ـ یازیچى، شاعیر ایله گنج آشیق اولان قلمداشیم جناب احمد اسدى نین ایضاحلارى
ـ www.arturmia.ir
ـ gencashiqlar.blogfa.com
آتا گونو موبارک اولسون
حضرت على (ع) ین دوغوم گونو ایله بیرگه آتا گونو بوتون آذربایجان آتالارینا موبارک اولسون.
آتا
یازان: حسین واحدی
هر بیر اینسانین آرخاسی،
قوللاریمیزین توم گوجو، اورگیمیزین اورگی،كرال لار- كرالی، آتادیر.
گئجه- گوندوزون یوخ ائدیر. عایله سی ایسه شن یاشاییر. جننت ایسه آنالاریندیر!
آتا، بوتون دونیانین پادیشاهیدیر. دونیانین كؤكو بیزیمده اولسا، «یئنه سولطان آتادیر.»
آتا، گوجدور، باشا تاج، قلبه فرحدیر. او حورمت دیر، كیشیلیكدیر، تومجه لره (جمله لره) گلمه ین بیر دیریلیک دیر.
آتا شرفدیر، شؤوكتدیر، زیروه دیر، ربّ دیر. آتا بیزی دونیایا پای وئرن ان قیمت لى ملک دیر.
آتا، آتادیر...
ایشسیز
ایشسیز
یازان: حسین واحدی
یولوندا گئدیب، دام- دووارا باخیردی. بیری دئییردی- بیری گولوردو. بیری ساواشیردی، بیری ماشینی ندا ماهنی آچیب، سسین اوقدر چوخالتمیشدی، ائله بیل اؤزگلره ایسته نیلن ماهنی لارینی یاییر. بیری هارای چكیردی گلین آپارین یئرآلمانین اوچ كیلوسو ایكی مین تومن و...
آیخان ایسه ایره لى، گئدیردی. آنسیز، گؤزو بیر كاغیذا چارپدی، «ایكی نفر ساده ایشچی، قوتو باغلاماق اوچون ایسته ییریك، تئلفون نومره سی ایله آدرسینی ده»-یازمیشدی. سئوینیب تئز كاغیذی دوواردان قوپاردیب، موبایل ایله یازدیقلاری تئلفون سایی سینا زنگ آچدی. بیر خانیم تئلفون دا دانیشیب، صاباحیسی گونه آیخانا واخت وئردی. سحر تئزدن آیخان سئوینه-سئوینه یوخودان اویانیب ایشچی آختاران بیلدیریشی وئرن شیركته ساری یوللاندی...
آیخان شیركت ده، ایداری بؤلومونه گئتدی. ایچری گیریب اورداكی آداما: «ایش اوچون گلمیشم» دئدی. کیشى هئچ نه سوروشمادان، «پارتین وار؟»-دئیه سوروشدو!
آیخان، «یوخ» جوابی وئردیگینده، كیشی، گؤزلرین بره لدیب، «ائله ده، سؤزو اوزالتمایاق، گوله-گوله، هله لیک!»-دئدی.
سوروجولوک ائتمه یه، کولتور ایسته ییر!
سوروجولوک ائتمه یه، کولتور ایسته ییر!
یازان: حسین واحدی
نئچه ایل دیر، اورمیه ده ترافیک قونوسو، گون قونولاردان سایلییر. بو شهرده اولان لار ایله قوناق گلیب خیاوانلاردا گزن لر، یوزده- یوز ترافیکی یاخین دان گؤروب، لذت-ین چکیبلر!
نئچه واخت، بو لذت لى ترافیک مسئله سین، گؤزه آلمیشام. یئرینیز بوش ماراقلی صحنه لر له اؤز-اوزه گلمیشم. اونلاردان بیر نئچه سین، سیز عزیز اوخوجولاریمیزلا پایلاشماق ایسته دیم. بو ماجرالارین چوخو یوزده-یوز سیزین شهرده ده واردیر! اینانیرام، بعضى بئله مسئله لرین چوخون اؤزوموز حل ائده بیله ریک. آنجاق، اؤزوموز ایسته مه یینجه، هئچ قایدا-قانون ایله ترافیک مسئله سى دوزلمه یه جک. ترافیکى طرح لر ایله باشقا یوللار، سونوندا یئنه بیزیم سوروجولوک کولتوروموزه (فرهنگیمیزه) قاییدیر.
ماشین لا، خیاوانلارین بیرینده گئدیردیم. قاباغیمداکى ماشینین سوروجوسو، آغزین گؤیه آچیب، قارغا لاری ساییر! قاباغیندا ماشین یوخ. آرخاسیندا ترافیک چوخ! گئدیب بیر دؤرد یولا چاتدیم، چیراق من چاتانا سارى اولدو. خیاواندا چکیلن خط-ین آرخاسیندا ساخلادیم. من دن سونرا گلن ماشین الین سیقینالا باسیب، منه، «ندن گئتمه دین»-دئییر! اولا بیلر هله چیراقلارین آنلامین بیلمه ییر! بیر آزدان سول الیمدکى یولون چیراغى، یاشیل اولدو. گئتمک اؤچون، اوتوز ثانیه واخت وار ایدى. واخت قورتولدو. چیراق دا، قیرمیزی اولدو. آنجاق، سول الدن گلن ماشین لار بونو سایمایاراق گئتمه گه، هجوم چکمیشدیرلر. اؤز واخت لاریندان علاوه، اؤزلرینین سول الینده کى ماشین لارین اوتوز ثانیه لرین یئدیلر. سونوندا پلیس مداخله ائدیب دؤرد یولو آچدی. عزیز اوخوجولار! نه یی دئییم؟ نه قالسین؟!
ترافیکه دقت وئردیگیمین ایکینجى گونو ایدی. سئرویس ایله شیرکتدن ائوه دؤنوردوم. خیاوانلارین بیرینده بیر خانیم سوروجو، پارک ائتمکده ایدی. بیر یاندان بیزیم سئرویس(مینی بوس)، او بیری یاندان ایسه باشقا ماشینلار. سوروجولرین ده، اللرى سیقینالدا. اولا بیلر، یازیق خانیما روحیه وئریردیلر. چاره سیز قالمیش قادین نه ائتدیگی نى بیلمه ییردی. هئچ کیم نئچه ثانیه دؤزمه یى دوشونمه ییب، آنجاق ندن بیر قادین سوروجولوک ائدیب یولو کسیبدیر اونلاری داها اینجیدیب، تیرافیکه نه دن اولموشدور. سئرویس ده اوتورانلارین بعضی سینین دئدی- قودوسوندان بونو آنلاماق اولوردو. اولا بیلر، بودا کولتور (فرهنگ) باخیمیندان دالی اولدوغوموز داندیر.
نئچه گون بو تیرافیک حادیثه سیندن سونرا، تاکسی ده شهرین اصلی خیاوانلارینین بیرینده گئدیردیم. یازیق سوروجونو آللاه ساخلاییردى. پیاده گئدنلر هئچ قانونو سایمادان، بیری گؤیدن، بیری یئرین آلتیندان، بیری ایسه بو الدن- او بیری اله گئتمک ایسته مک دن اؤترو، آنسیز (ناگهان) تاکسی نین قاباغیندان چیخیب، سوروجونون تئز- تئز ترمز توتماسینا نه دن اولوردولار. اولا بیلر خیاباندا مخصوص یئرلرده چکیلن پیاده لرین خیاباندان کئچمسی اوچون چکیلن خط لر، خیابانی بزمک اوچوندور. هر یئردن کئچمه گه، کئفی چکمک ایسته ین لر، ترافیک- ین یارانماسینا سبب اولموشدولار. سوروجولر قورخودان آیاقلارین گاز پئدالینا ساری آپارا بیلمه ییردیلر!
او گون، آخشام اوستو، اوتوبوس لا، بازاردان ائوه قاییداندا، گؤزوم یالنیز ماشینلاردا ایدى. ماشین لارین چوخوندا، بیر-ایکی نفر وار ایدی. مئیدان لاردا هر سوروجو اؤز آتین قوووردو. بیری ساغا، بیری سولا گئتمک ایسته ییردی. فقط هئچ کیم اؤنجه یول کیمیندیری دوشونمه ییردی. بو یول وئرمه مزلیک اوتوبوسو یاریم ساعاتدان چوخ مئیدادنلارین بیرینده ساخلادی. دوشونورم، بو اوزدن بعضی مئیدانلارا اوچ بویالی چیراق قویوبلار. اولا بیلر بیر یئرده قیزیل سکه وئریرلر، بعضی لری ده اونو آلماغا تله سیرلر!
ترافیک ماجراسینین، دؤردونجو گونونده، گون اورتا ایدى. دؤرد یوللارین بیرینده یولداشلاریمدان بیرینى، گؤزله ییردیم. تاکسی لار یوللارین بیرینده سیرالانمیشدیلار. هله آلتى-یئددى تاکسی بوم-بوش دایانیب، دؤرد-بئشى ده، اونلارین قیراغیندا دوبل ساخلاییب، او یولا چؤنن ماشین لار-دا چتینلیک له اؤزلرینه یول تاپیردیلار. ماراقلی سی، دوبل ساخلایان تاکسی لارا، یولو آچماق اوچون، چیراق وئرنده، ال- قول لارین اؤلچوب، حاقلی اولان ماشین لارا دئیینیردیلر. دئدیم، یقین مسافرین دگرى چوخالیب، تاکسی لار ایسه کئف لری چکنی میندیرمه دن ال چکیب، هامی یا قوللوق ائدیر!
گؤروشوم قورتولاندان سونرا، بیر تاکسى توتوب ائوه قایتماق ایسته دیم. گؤزونوز یامان گون گؤرمه سین. توو آلانلارین بیرینده تاکسى سوروجوسو ترمز توتاندا، یاواشجا قاباقداکى ماشینا دگدى. قاباقداکى ماشینین سوروجوسو لاپ او خط باشى وورانلاردان ایدى. ماشینینا هئچ نه اولمامیشدى. جیزیق بئله دوشمه میشدى. یئره دوشوب ماشینا باخاندان سونرا، تاکسی سوروجوسونون یاخاسیندان یاپیشدى. آغزینا هر نه گلدى قوجا تاکسی سوروجوسونه پای وئردی!! یئره دوشوب، نئچه نفرین یاردیمی ایله اونلاری آییردیق. یاریم ساعات یولو باغلایاندان سونرا تاکسی سوروجوسوندن اون مین تومن کسیب، گئتدی. بودا بیر جوره بوش یئرینه یارادیلان ترافیک لردن ایدى. اؤز- اؤزومه، «اولا بیلر، پول کسن سوروجونون ایشی بودور»-دئدیم. تاکسی دا اوتوروب، سوروجونون دئیینمه گینه قولاق آسا-آسا گئتمک ایسته دیگیم یئره چاتدیم. بوگون ده بئله قورتولدو.
بئشینجى گون، چوخ ماراقلی گون ایدی. اؤز ماشینیم لا بیلیم یوردونا (دانشگاها) گئدیردیم. یوللارین بیرینده بیر بانکین قاباغیندا پارک یئرلری دولوب، بعضی لری ده دوبل ساخلامیشدی. بانک-ا گئدن لر هر یئرده، هر نجور ایسته دیکلری کیمی ماشینی ساخلاییب، دوشوب بانک-ا قاچیردیلار. اوزون بیر ترافیک ده قالمیشدیم. «اولا بیلر، اورا قاچانلارا، اؤدول وئریرلر!»-دئدیم. من کیلاسا چاتان دا، بیر ساعات کلاسین واختیندان کئچمیشدی. اوستاد ایسه گئج یئتیشدیگیم اوچون غایب قویدو. کیلاسلاریم قورتولاتدان سونرا، بیر داها او یولو قاییتدیم. یولدا بیری گؤیدن قاباغیما دوشوردو. بیری یولون دگیشنده، یول گؤسترن چیراغی وورموردو. بیری یاواش-یاواش ماشین سوروب، پیادا گئدن جاماعاتا باخیردی. بیری موبایل ایله دانیشا- دانیشا سوروجولوک ائدیردی. بیری، خیاوانلارین ساغا چؤنمک یولون باغلامیشدی. بیری چیراق- میراق سایمیردی. پولیس اولمایان یئرلرین دورمو هئچ خوش دگیلدی. آنجاق هر کیم قانون ایله بو خیاوانلاردا سوروجولوک ائدیردى، وای حالینا اولوردو!! آخشام ائوه یئتیشیب، «ترافیک- ین چوخونون، اؤزوموز یارادیریق.»-دوشوندوم.
بیر داها تکرارلاییرام. اؤزوموزده ترافیکی حل ائتمه سک، هئچ واخت ترافیک مسئله سی حل اولمایاجاق. اؤزوموز سوروجولوک قانون لارینا عمل ائتمه سک، ترافیک ده آرادان گئتمه یه جک. بیر- بیریمیزه یول وئرمک، پیادا اولاندا اؤز یولوموزدان کئچمک و... بونلاردا باشقا سبب لردیرلر. سونوندا، «ترافیک، یانی اؤزوموز یارادان بیر اوزون، ماشین سرگی سی (نمایشگاهى).»- دئیه بیلرم.
من ایتن گون
من ایتن گون
یازان: ایساك بشویس سینگر(1)
چئویرمن: حسین واحدی
منی تانیماق راحات ایش اولمالی. خیاواندا اوزون ایله گئن پالتو گئین بیر كیشی گؤردویونوزده، اوشاق قبیری باشماق آیاغیندا، چوخ بوزوشموش شاپقالی بؤرك باشیندا اولان، گؤزلوگونون بیر شوشه سی اولمایان، گونش ده ایسه چتیر گؤتورن بیر كیشی گؤردویونوزده، او منم، شك ائتمه یین: «پروفسور اشلمیل.»
یاغیش اولماق ایسته ییرم، اورمو گؤلومه
یاغیش اولماق ایسته ییرم، اورمو گؤلومه
یازان: حسین واحدی
یاغیش یاغاندا، اوره ییم سیخیلاردی، دئمك اولار دونیا بیله مه دارالاردی، ندنی، گونش اولاندا فوتبال اویناماغا واخت تاپاردیق اولا بیلردی! نه یسه نه بیله یدیم بیر گون ائله بو یاغیش حسرت اولاجاقدیر بیزه! گونشه، دایان، آزجا یاغیش یاغماغا زامان وئر دئمك ایسته ییردیم، بولودلار قاچین گونش دایانیب، سیز یاغاسیز، آغلایین، واخت قورتولماقدادیر، آماندیر یاز – یای – گوز(güz) – قیش دئمه یین، آنجاق یاغیش یاغدیرین...
سئومك آنلامینی بو دویغولار منه وئردیلر. هئچ نه یی یارادانیمدان سونرا بو قدر سئوه بیلمه میشدیم، هئچ نه یی بو قدر دوشونمه میشدیم، هئچ نه یه بو قدر نیسگیل ائتمه میشدیم...
یارادانیم! سن، ایشیق وئرن كیتابیندا هر ندن چوخ، «من، باغیشلایان و یاخشیلیق ائده نم» دئییبسن و منده بونا اینانیرام، سن سونسوز سئوگیندن و اوجسوز – بیجاقسیز یاخشیلیغیندان بیزه باغیشلایاجاقسان، بیلیرم...
یاغمور، نه اولار دایانمادان، یاغ، بوتون كدریمی سن آلمالیسان، سئوگیمی منه قایتارمالیسان، جانیما جان قاتمالیسان...
یاراداینم، بولودلار، یاغمور، اینسانلار، یارانیش لار و بوتون جانلی و جانسیزلار دویون و آنلایین منیم اورمو گؤلومو...
یارادانیم؛ بوتون سئوگینله قورو سئوگیمی. یاغ یاغیش؛ هئچ دایانما، گؤلوم سنی گؤزله ییر. گونش؛ چیخما هئچ. بولودلار؛ یولو آچین، گلین یوردوما، آغلایین، اؤلو اورمو گؤلومه!!
اوغرو اولماق ایسته ییرم
اوغرو اولماق ایسته ییرم
یازان : حسین واحدی
هامی نی دیندیردیم، دئدیم« نه اولماق ایسته ییر دینیز؟» بیلمه دیم ندن هئچ كیمسه اوغرو اولماق ایسته مدی؟ اؤز- اؤزومله؛ «چوخ گؤزل یوردوما دوزلوك گلیب دیر، اوغرولار بو یورددان كؤچوب لر، دوزلوك لره یئرلرین وئریب لر، نه گؤزل!» -دئدیم.
سونوندا اؤزومدن سوروشدوم بو سورویو؟ آی اوغلان سن ایسه نه اولماق ایسته ییرسن؟ هئچ بونا بیر آن دا دوشونوبسن می؟ قاییدیب اؤزومه بیله سؤیله دیم:
من اوغرو اولماق ایسته ییرم یوردوما، دام- دوواریندان دیرماشام هر گون، ائلیمین ائولریندن كدری- غمی اؤزومله اوغورلایب آپارام !
اوغرو اولماق ایسته ییرم، گیزلیجه گیرم خالقیمین اوركلرینه، الجك تاخام اللریمه، اوركلریندن كینی- نیفرتی، قازدیریب اؤزومله آپارام!
اوغرو اولماق ایسته ییرم، آخشام اوستو ائولره گئدم، تلویزیونلاری اوغورلایام، بلكه سئوگینی یئرینه قویام، اینسانلار آیریلمایا بیر- بیریندن، فیكیرلر عاییله یانیندا اولا، سریال لار- فیلم لر آرادان گئده، اوشاقلار، عاییله مئیدانا گیره!
اوغرو اولماق ایسته ییرم، دینمه دن، سس سیزجه یوردوما گیرم، هئچ كیم بیلمه دن ائله جه گئدم، كیمسه بیلمه یه آیریلیق نئجه اولدو، كیم اوغور لادی كیم قویمادی قارداش-قارداش دان، آتا- بالادان، باجی- باجی دان آیریلا بیلسین، هئچ كیمه دئمه رم من اوغورلادیم ، من آپارمیشام آیریلیغینیزی، تاپا بیلمه سیز اونو هئچ یئردن، قایتارمارام بیر داها سیزه!
اوغرو اولماق ایسته ییرم، آنا دنیزلرین سویونا گئدیب دنیز بیلمه دن سو لارین قاپام، اؤزومله، قورموش گؤلومه گتیرم، قویمایام قورویا، اوركلر سولا!
اوغرو اولماق ایسته ییرم، قارانلیق دوشنده، گیرم یوردوما، آج لیغی، یوخسول لوغو گؤتوروب قاچام، قویمایام بیر اوشاق آج یاتا بیلسین، حسرت ده قویام یوخسول لوغو من!
اوغرو اولماق ایسته ییرم، من لیغی- غرورو، سوی تاپینماسین، اوغورلاییب آپارام، قویمایام كیمسه دئیه بیرینه من سندن اوستونم، اؤنجه گلمیشم!
اوغرو اولماق ایسته ییرم، گونش چیخمامیش گیرم یوردوما، بوتون دوشمنلیك لری گؤتوروب قاچام، قویمایام ساواشی، قالا یوردوما، یئرینه باریشی- صولحو وئرم من!
اوغرو اولماق ایسته ییرم، بوتون ساتقین لاری اوغورلایام ائلیمدن، ائلیمده راحاتجا نفسین چكه، قویمایام یارپاقلاری سولا ائلیمین!
اوغرو اولماق ایسته ییرم، بوتون سیلاحلاری یئر اوزوندن اوغورلاماق ایسته ییرم...
اوغرو اولماق ایسته ییرم من، یازیلاریمدان حاققی سیلن اولسا، اونو اوغورلاماق ایسته ییرم من، قویمارام یازیلاریمدان حاق سؤزو سیلینیب آلینسین مندن!
تاریخیمیز وارلیغیمیز
تاریخیمیز، وارلیغیمیز
یازان: حسین واحدی
هر بیر اؤلکه نین، هر بیر شهرین، اؤزو اوچون، کئچمیشى ایله تاریخى واردیر. آتا- بابالاریمیز، دئمیش کن: «کئچمیشى اولمایان خالقین، گله جه یى، اولا بیلمز.» بو گؤزل آتالار سؤزو، قونونو، آچیق- آیدین، آچیقلاییر. گؤزل، یام- یاشیل، افتخارلى، کئچمیشى ایله گله جه گى پارلاق، عزیزایرانین باشى اولان، سئویملى آذربایجانین، قاریش- قاریشى تاریخى ایزلرله دولودور. آذربایجان بؤلگه سینده اولان، بعضى تاریخى اثرلر، ایران-دان علاوه دونیادا ایسه تانینمیش و آدلیمدیرلار.
اونلاردان، «تیکان تپه ده، سوغورلو(تخت سلیمان)- اورمیه ده گؤگ تپه، جومعه مچیدى- سولدوز دا، حسنلى تپه سى- ماکى دا، قارا کلیسا- اردبیل ده شیخ صفى الدینین مزارى، جمعه مچیدى- شهر یئرى، خیاو دا- تبریز ده، گؤى مچید،تبیر بازارى، علیشاه ارکى- کلیبر ده، بذ قالاسى- جولفا دا، سنت استپانوس کلیساسى- ماراغا دا، رصد خانا- زنجان دا، سلطانیه گونبزى و ...» آد اپارماق اولار. بو آرادا، غربی آذربایجانا دؤندویوموزده، گؤزل و تایسیز طبیعتینین یانیندا، مختلف دئورلردن قالمیش اثرلرله، هر اینسانین ماراقینى اؤزونه چکیر. بو تاریخى اثرلر، بیزیم پارلاق کئچمیشیمیزى گؤستَرمکدن علاوه، باشقا یؤن (جهت) لردن ده، اهمیت لى ساییلیر. بو مهم لردن بیری توریست لرین علاقه سینى بؤلگه میزه چکمک دیر.
بو قونویا حددن آرتیق اؤنم (اهمیت) وئرمه لى ییک. توریستى اولان، اؤلکه لر و اونلارین ایچینده شهرلر،اقتصادى دورومدان، یوکسک یئرده دایانیب لار. توریست لرین گلمه سییله،مختلف ایش لر یارانیب، ایش فرصتی ده چوخالار. باتى آذربایجان دفعه لرله یازیلیب، دئییلدیک لره تای، توریستى باخیمدان یوخارى پتانسییله مالیک دیر. آنجاق بونا نه قه در دیَر وئریلیب، یوخسا وئریلمه ییب دیر، سیز عزیز اوخوجولاریمیز داها یاخشی بیلیرسینیز! تاریخى اثرلریمیزى نه قه در قوروموشوق هامى یا بللى دیر. اوستانین، چوخلو شهرلرایله کندلرینده ، کئچمیشدن یادگار قالان ایزلرى قوروماق هامیمیزین بورجوسایلیر.
غربی آذربایجانین، اؤزللیکله اونون مرکزى ساییلان اورمیه نین، بعضى اثرلرى باشى سویوقلوق ایله باخمامازلیق دان، آرادان گئدیب، بعضى لرى ده، آرادان گئتمک وضعیتینده دیرلر. ائل بیل، اؤز الیمیزله، کئچمیشیمیزى آرادان آپارماق دا، تایسیز اولماق ایسته ییریک!
شهرلرى یئنی لَتمک (نو سازى) آدییلا ، تاریخى اثرلرى، قدیم معمارلیق لا قالان بینالارى، ییخیب یئرلرینه آپارتمان تیکمک، مدرنچیلیک و شهره قوللوق ائتمک اولا بیلمز. آپارتمان قاییرماق، شهرى بؤیوتمک، یئنى ائولر دوزتمک و...، قدیم و تاریخی اثرلرى آرادان آپارماغا سبب و بهانه ساییلمیر. هئچ ندن (علت( له،کئچمیشیمیزى سیلمه یه حاققیمیز یوخدور. آتا-بابالاریمیزین کئچمیشدن یادگار قویدوغو اثرلر، الیمیزده بیر امانت اولوب، گله جک نسیل لره، ساخلاییب، امانتى اونلارا یئتیرمه لى ییک. بوتون بو اثرلر کئچمیشیمیزدن سؤز آچاراق بو شهرین کیملیغین ده ثبوتا یئتیریر. بو بیزیم اوچون هرحالدا اؤنملی اولمالیدیر.
شهریمیزده اولان بوتون تاریخی مچیدلر، بؤیوک بازار، بدیرلی قالاسینا تای تیکینتی لر و اؤزللیک له آدلار، بو شهرین کیملیغین گؤستریر و بیزلر بو گون بورجوموز اولاراق بونلاری قورویوب ساخلامالیییق. اونلارجا صفی الدین اورموی، حسام الدین چلبی، میرزا علی عسگر آبادی یه تای عالیم لر، یوزلرجه کلبعلی خان افشار، قاسیملو خان افشار، ممد قولوخان، حیدر عمواوغلو، مش ایسماعیل خان تای ایگید قهرمانلار ، محدث لر، جبار باخچابانلار و طرزی افشار، مریم جهانگیریه تای ادیبلر و گونو بوگونده مین لرجه عسگرخانلارا، کاظیم خانلارا، باکری لره تای بو توپراغین کئشیین چکن آسلان لاری وار .
بوگون، ایران و دونیا اوزره تانینان، اصفهان ایله شیراز و ...، آدچیخاریب توریستی شهر تانینسالاردا، بونون اساس سببی تاریخى اثرلر ائله جه فرهنگی مفاخرلرینه دَیر وئرمک دیر. ایلده میلیونلارجا، توریست قبول ائدن بئله شهرلرین، اقتصادى وضعیتلرى ده داها آرتیق اینکیشاف ائدیر. اونلار ایله بیزیم فرقیمیز، یالنیز، بیر زاددیر: «اونلار اثرلرین، مفاخرلرین، قورویوب، ساخلاییب، تانیتدیریب لار و توریست گتیرمک اوچون، تانینمالارینا زحمت چکیب لر، بیز ده، ...!!!»
اومود ائدیرم، بو موضوع یا، بوتون اوستانى مسئول لاریمیز، جاماعات ایله بیرلیک ده، تاریخى اثرلریمیزى ساخلاماغا و کئچمیش ایله ایندى ده اولان آدلیم قهرمان لاریمیزا، صاحاب چیخیب، بؤلگه یه، توریست جذب ائتمه گه، داها چوخ زحمت چکیب، بؤیوک آددیم لار آتیب، بیزلرى آللاهین اومود ایله،گله جک نسیل لرین یانیندا، باش اوجا ائتسین لر.
